རྫོང་ཡོངས་ཀྱི་སློབ་གྲྭ་ཆུང་འབྲིང་གི་སློབ་མར་སྤྲིངས་པའི་
འཕྲིན་ཡིག
མཛའ་ཞིང་བརྩེ་བའི་སློབ་གྲོགས་རྣམ་པ།
ཁམས་བདེ།
སྤྱིར་ཡིན་ན་ཡིད་འཕྲོག་དཔྱིད་ཀྱི་དཔལ་མོས་སྒེག་པའི་གོམ་སྟབས་ས་གཞིར་སྒྱུར་བའི་སྐབས་འདི་ནི་ང་ཚོས་སློབ་རའི་ནང་དུ་སློབ་སྦྱོང་བྱེད་པའི་དུས་ཡིན་མོད། ཡིན་ཡང་ད་ལོའི་ལོ་མགོར་གློ་བུར་དུ་བྱུང་བའི་ཏོག་གསར་གློ་ཚད་ཅེས་པའི་རིམས་ནད་ཀྱིས་ང་ཚོ་དུས་ལྟར་སློབ་རར་འཛོམས་པར་བར་ཆད་བཟོས་བྱུང་། འདས་ཟིན་པའི་དུས་སྐབས་ངེས་ཅན་ཞིག་གི་རིང་ལ་སློབ་གྲོགས་ཚོས་ཁྱིམ་བདག་དང་མཉམ་དུ་ཞིང་ཆེན་དང་། ཁུལ། རྫོང་། གོང་རིམ་སློབ་གསོའི་སྡེ་ཁག་བཅས་ཀྱི་བླང་བྱ་ལྟར་ཁྱིམ་སྡོད་ལོགས་བཀར་འགོག་སྲུང་བྱས་པ་དང་། རྡོག་རྩ་གཅིག་སྒྲིལ་གྱིས་རིམས་ནད་མཉམ་འགོག་བྱས་པས་ཁྱོད་ཚོའི་བྱ་སྤྱོད་ལ་སྙིང་ཐག་པ་ནས་བསྔགས་བརྗོད་བྱེད་ཀྱིན་ཡོད། ཁྱོད་ཚོ་ནི་ཆེས་ཡིད་དུ་འོང་བ་ཏག་ཏག་རེད། མིག་སྔར་རྒྱལ་ཡོངས་ཀྱི་རིམས་ནད་སྔོན་འགོག་ཚོད་འཛིན་གྱི་གནས་བབ་སྔར་བཞིན་ཛ་དྲག་ཡིན་པས་ང་ཚོའི་སློབ་མགོ་ཚུགས་པའི་དུས་ཚོད་ཕྱིར་སྣུར་བྱེད་དགོས་བྱུང་། འདི་ནི་དུས་རྒྱུན་དང་མི་མཚུངས་པའི་དགུན་གནང་ཁྱད་པར་བ་ཞིག་ཡིན་ལ། ང་ཚོའི་བཟོད་སེམས་ལ་ཚོད་བགམ་བྱེད་པའི་དམིགས་བསལ་གྱི་རྒྱུགས་ར་ཞིག་ཀྱང་ཡིན་པས། ཚང་མས་མུ་མཐུད་དུ་ལག་གདང་དཔུང་སྒྲིག་སྒོས་རིམས་ནད་ལ་འགོག་རྒོལ་བྱས་ཏེ། དམིགས་བསལ་གྱི་རྒྱུགས་གཞི་འདི་ལ་བློ་ཡིད་ཚིམ་པའི་རྒྱུགས་ལན་ཞིག་འབུལ་བའི་རེ་བ་ཞུས་པ་ཡིན།
གཅིག སློབ་འགོ་མ་ཚུགས་སྔོན་ལ། ང་ཚོས་རྒྱལ་ཁབ་དང་གོང་རིམ་སློབ་གསོའི་སྡེ་ཁག་གི་བླང་བྱ་དག་ལ་བརྩི་སྲུང་ནན་མོ་བྱས་ཏེ། མི་སྒེར་གྱི་འགོག་སྲུང་ཡག་པོ་བྱེད་པ་དང་། རང་གཅུན་རང་འདོམས་བྱེད་པ། ཕྱི་ལ་ཉུང་འགྲོ་དང་། གསོལ་སྟོན་འདུ་འཛོམས་མི་བྱེད་པ། ཁ་ཐུམ་རྒྱག་པ་དང་། ལག་པ་གཙང་མར་བཀྲུ་བ། རང་སྲོག་ལ་བསྲུང་སྐྱོབ་བྱེད་པ་། རང་བྱུང་ཁམས་དང་སྒྲིག་སྲོལ་ལ་བརྩི་འཇོག་བྱེད་དགོས་ལ། ལོ་ན་ཆུང་ཡང་རང་རློམ་བྱེད་མི་རུང་བ་དང་། དཔའ་སྙིང་ཆེ་ཡང་ཧོལ་རྒྱུག་བྱེད་མི་འོས་པ་ཤེས་དགོས།
གཉིས། སློབ་གྲྭར་འགྲོ་མི་དགོས་པ་དེས་སློབ་སྦྱོང་བྱེད་མི་དགོས་ཟེར་བ་གཏན་ནས་མ་ཡིན་ལ། དཀའ་ངལ་གསར་པ་དང་གནད་དོན་གསར་པར་འཕྲད་པ་འདིའང་ཤེས་བྱ་གསར་པ་ཐོབ་པ་དང་། རྩལ་ནུས་གསར་པ་སློབ་པར་ཕན་པའི་གོ་སྐབས་ཤིག་ཡིན། རིམས་ནད་འགོག་སྲུང་གི་སྐབས་འདིར་དགེ་རྒན་རྣམ་པས་དྲ་ཐོག་ནས་ཇི་ལྟར་སློབ་ཁྲིད་བྱ་བར་སློབ་སྦྱོང་བྱེད་ཀྱིན་ཡོད་ལ། ལྷག་པར་དུ་སློབ་ཁང་སློབ་ཁྲིད་དེ་དྲ་ཐོག་སློབ་ཁྲིད་དུ་བསྒྱུར་བའི་རྩལ་ནུས་གསར་པར་སློབ་སྦྱོང་བྱེད་ཀྱིན་ཡོད། རྒྱ་ཆེའི་སློབ་གྲོགས་རྣམས་ཀྱིས“ཚོགས་མཚམས་བཞག་ཀྱང་འཁྲིད་མཚམས་མི་འཇོག་པ་དང་།ཚོགས་མཚམས་བཞག་ཀྱང་སྦྱོང་མཚམས་མི་འཇོག་པ”ཞེས་པའི་ནང་དོན་ལ་གོ་བ་གཏིང་ཟབ་ལེན་དགོས་པ་དང་། ཁྱིམ་དུ་སྡོད་པའི་དུས་ཚོད་བེད་སྤྱོད་གང་ལེགས་བྱས་ཏེ། ལུས་སྦྱོང་བྱེད་ཤེས་པ་དང་། གཙང་སྦྲ་བྱེད་ཤེས་པ། འགོག་སྲུང་བྱེད་ཤེས་པ། ཁྱིམ་ལས་བྱེད་ཤེས་པ། འབྲེལ་འདྲིས་བྱེད་ཤེས་པ་བཅས་བྱེད་དགོས་ལ། དེ་དང་ཆབས་ཅིག་སློབ་སྦྱོང་གི་འཆར་གཞི་ལེགས་པོ་བཟོས་ཏེ། དཔེ་ཆ་མང་ཙམ་ཀློག་པ་དང་། དཔེ་ཆ་གང་བཟང་ཀློག་པ་རྒྱུན་འཁྱོངས་བྱེད་དགོས་ལ། ཁྱིམ་སྡོད་དུས་ཚོད་གང་དེ་སློབ་གཉེར་གྱིབགྲོད་་ལམ་སྙེག་པའི་གོ་སྐབས་ཤིག་ཏུ་བཟུང་ནས་བདེ་ཐང་སྲུང་སྐྱོབ་དང་ ཤེས་བྱ་སློབ་སྦྱོང་གཉིས་ཀ་ལེགས་འགྲུབ་ཡོང་བར་འགན་ལེན་བྱེད་དགོས།
གསུམ། རི་སྐྱེས་སྲོག་ཆགས་ནི་མིའི་རིགས་ཀྱི་གྲོགས་པོ་ཡིན་གཤིས། དེ་དག་ལ་སྲུང་སྐྱོབ་བྱེད་པ་ནི་རང་ཉིད་ལ་སྲུང་སྐྱོབ་བྱེད་པ་ཡིན་ལ། སྒོས་སུ་མི་དང་རང་བྱུང་ཁམས་དབར་འཆམ་མཐུན་མཉམ་གནས་ཀྱི་སྤྱི་ཚོགས་ཤིག་འཛུགས་པ་ནི་ང་ཚོའི་མཐར་ཐུག་གི་དམིགས་ཡུལ་དེ་ལགས། དེར་བརྟེན། རྫོང་ཡོངས་ཀྱི་སློབ་མ་རྣམས་ཀྱིས་དུས་ད་ལྟ་ནས་འགོ་རྩོམ་པ་དང་། བྱ་བ་ཙག་་ཙག་ནས་འགོ་བཙུགས་ཏེ་བསམ་པ་བཟང་ལ་འགན་འཁྲི་ཡོད་པའི་གྲོགས་པོ་ཆུང་ཆུང་ཞིག་བྱེད་རྒྱུའི་རེ་བ་ཡོད། དེ་དང་ཆབས་ཅིག་སློབ་གྲོགས་ཚོས་དྲིལ་སྒྲོག་པ་ཆུང་ངུ་ཞིག་གི་འགན་འཁྲི་ཡོངས་སུ་བླངས་ཏེ། ཁྱིམ་བདག་དང་གཉེན་ཉེ་གྲོགས་པོ་ཀུན་ལ་རི་སྐྱེས་སྲོག་ཆགས་ཀྱི་ཤ་བཟའ་མི་ཉན་པ་དང་། ཉེ་འཁོར་གྱི་མི་ཀུན་ལ་སྲོག་ཆགས་ནི་མིའི་རིགས་ཀྱི་གྲོགས་པོ་ཡིན་པ། རི་སྐྱེས་སྲོག་ཆགས་ལ་སྲུང་སྐྱོབ་བྱ་རྒྱུ་ནི་ང་ཚོ་ཚང་མའི་འགན་འཁྲི་ཡིན་པ་ཤེས་སུ་འཇུག་དགོས།
བཞི། དྲ་རྒྱའི་ཆ་འཕྲིན་ལ་ལྟ་སྟངས་ཡང་དག་བཟུང་ནས་རང་གི་ལངས་ཕྱོགས་བརྟན་པོ་བྱེད་དགོས། དྲ་རྒྱའི་ཐོག་འདྲ་མིན་སྣ་ཚོགས་ཀྱི་དཀྲོག་གཏམ་གྱིས་ཁེངས་ཡོད་པ་དང། དཀྲོག་གཏམ་གྱིས་དམངས་སེམས་ལ་འཇིགས་སྣང་སྤྲོད་པ་ལ། རིམས་ནད་སྔོན་འགོག་ཚོད་འཛིན་བྱ་བར་ཤུགས་རྐྱེན་ངན་པ་ཐེབས་ངེས་པ་དང་། ཐ་ན“ཞོར་ཐོན་རིམས་ནད་”ཀྱང་བཟོ་ངེས། དམིགས་བསལ་གྱི་དུས་སྐབས་འདིར་སློབ་གྲོགས་ཚོས་ཁྱིམ་བདག་དང་མཉམ་དུ་ལངས་ཕྱོགས་བརྟན་པོ་དང་། ལེགས་ཉེས་ལ་བླང་དོར་བྱེད་པ། ཡིན་མིན་བརྡར་ཤ་བཅད་དེ་རིམས་འགོག་བྱེད་དགོས་པ་ལས། རྨོངས་ཚོད་ཀྱིས་དཀྲོག་གཏམ་བཟོ་བ་དང་། དཀྲོག་གཏམ་ལ་ཡིད་ཆེས་བྱེད་པ། དཀྲོག་གཏམ་སྤེལ་བ་སོགས་གཏན་ནས་བྱ་མི་རུང་།
མཛའ་ཞིང་བརྩེ་བའི་སློབ་གྲོགས་ཚོ། འཕྲིན་ཡིག་འདི་བརྒྱུད་ནས་ངས་ཁྱོད་ཚོར་ནན་གྱིས་བརྗོད་འདོད་པ་ནི་། ང་ཚོར་སྟོབས་དང་ལྡན་པའི་རྒྱལ་ཁབ་ཞིག་གི་རྒྱབ་རྟེན་ཡོད་པས། ཁྱོད་ཚོས་ཡིད་ཆེས་བརྟན་པོས་དཀའ་བ་ཁྱད་དུ་བསད་ཏེ་བློ་སེམས་རྣལ་དུ་ཕབ་ནས་སློབ་སྦྱོང་བྱ་ཆོག།
ནམ་ཡང་ཡལ་བ་མེད་པའི་དགུན་གཞུང་ཞིག་ཡོད་མི་སྲིད་ལ། ནམ་ཡང་སླེབས་རྒྱུ་མེད་པའི་དཔྱིད་དུས་ཤིག་ཀྱང་ཡོད་མི་སྲིད་པས། ང་ཚོ་རིམས་ནད་ལས་རྣམ་པར་རྒྱལ་ཏེ། དཔྱིད་དུས་ཀྱི་མེ་ཏོག་སྣ་བརྒྱ་བཞད་པའི་དུས་ཚིགས་དེར་སླར་ཡང་བརྩེ་བས་ཕྱུག་པའི་སློབ་རའི་ནང་དུ་འཛོམས་ཡོང་ །
རྩེ་ཁོག་རྫོང་སློབ་གསོ་ཅུའུ་ཨུ་ཡོན་ལྷན་ཁང་ནས།
2020ལོའི་ཟླ་3ཚེས་7ཉིན།